logo

bar

आन्दोलीत राहत शिक्षकले ज्ञापनपत्र बुझाए

पूर्णप्रसाद न्यौपाने/नयाँ पत्रिका ओखलढुंगा, ३ जेठ । | जेठ ०४, २०७५

ओखलढुंगामा कार्यरत राहत शिक्षकले आन्दोलन थालेका छन् । स्थानीय सरकार समक्ष विभिन्न माग राख्दै उनीहरुले आन्दोलन थालेका हुन् ।

राज्यले शिक्षण पेशामा दरबन्दीका शिक्षक सरह योगदान गरेका राहत शिक्षहरुलाई सेवा सुविधामा विभेद गरेको भन्दै आन्दोलन थालेका हुन् । माग सम्बोधन नभए कडा आन्दोलनमा उत्रिने तयारी गरेको राहत शिक्षक जिल्ला समितिका अध्यक्ष तोयानाथ काफ्लेले बताए । ‘राहत शिक्षककै भरमा विद्यालय चलेका छन् तर उनिहरुलाई नै राज्यले उपेक्षा गरेकाले हामी आन्दोलन गर्न बाध्य भएका हौैं’ अध्यक्ष काफ्लेले भने, ‘पटक पटकका आन्दोलन र मागहरु केन्द्रिय सरकारले वास्ता गरेन त्यसैले स्थानीय सरकार मार्फत समाधानको आशा गरेका छौं ।’ उनका अनुसार ओखलढुंगामा आधारभूत तहमा ४ सय र माध्यमिक तहका ९४ गरी ४ सय ९४ जना राहत शिक्षक कार्यरत छन् । 

जिल्लाका स्थानीय तहहरुमा ज्ञापन पत्र बुझाउँदै राहत शिक्षक जिल्ला समितिले स्थानीय तहमा बनाइने शिक्षा नीतिमा सहभागिता सुश्निचित गर्न, सरकारी अनुदानमा नियुक्त सबै शिक्षकको सरुवा हुनुपर्ने, योग्यता पुगेका राहत शिक्षकलाई प्रधानाध्यापक बन्न पाउनु पर्ने माग गरेका छन् । त्यस्तै राहत शिक्षकलाई विषय विज्ञ हुन पाउनु पर्ने, राहत शिक्षकको पेशागत सुरक्षा हुन पर्ने लगायतका मागसहित ओखलढुंगाका एक नगरपालिकासहित आठ स्थानीय तहमा ज्ञापन पत्र बुझाएका छन् ।

ज्ञापन पत्र बुझ्दै सिद्धिचरण नगरपालिकाका उपप्रमुख ईच्छा कुमारी गुरुङले कार्यपालिकाको आगामी बैठकमा राहत शिक्षकका सवालमा पनि छलफल गर्ने बताईन् । राज्यले गरेको भनिएको विभेदका विषयमा आफुहरुले आवाज उठाउने उनले प्रतिवद्धता जनाईन् ।
ज्ञापन पत्र बुझाउन नगरक्षेत्रका राहत शिक्षकहरु सदरमुकाममा भेला भएका थिए ।

तपाईको प्रतिक्रिया

सम्बन्धित समाचारहरु

लोकप्रिय समाचारहरु