logo

bar

हारका कारण खोज्दै राप्रपा

नयाँ पत्रिका काठमाडौं, ४ पुस | पुष ०४, २०७४

प्रदेश सभा र प्रतिनिधिसभा निर्वाचनमा अप्रत्यासित हार व्यहोरेको राष्ट्रिय प्रजातन्त्र पार्टीले हारको कारण खोज्न पाँचवटै विकास क्षेत्रमा केन्द्रीय टोली खटाउने भएको छ । केन्द्रीय पदाधिकारीले नेतृत्व गर्ने ६ टोली यही साताभित्र कार्यक्षेत्रमा खटिइसक्ने वरिष्ठ उपाध्यक्ष बुद्धिमान तामाङले जानकारी दिए ।

उनका अनुसार पूर्वाञ्चलमा महामन्त्री राजेन्द्र लिङ्देनको नेतृत्वमा सहायकमहामन्त्री कुन्ती शाहीसहितका नेता खटिनेछन् । मध्यमाञ्चलमा वरिष्ठ उपाध्यक्ष तामाङ र पार्टी प्रवक्ता सुशील श्रेष्ठलगायतको टोली, वाग्मती अञ्चलमा भाष्कर भद्रा र कान्ता भट्टराईसहितको टोली, पश्चिमाञ्चलमा उपाध्यक्ष दिलविकास राजभण्डारी, विक्रम थापा, भीमप्रसाद गौचन, हेमजंग गुरुङसहितको टोली खटिनेछन् ।

त्यस्तै, मध्यपश्चिमाञ्चलमा महामन्त्री जयन्त चन्दको नेतृत्वमा अर्का महामन्त्री धवलशमशेर राणासहितको टोली र सुदूरपश्चिममा दिलनाथ गिरी, चन्द्रबहादुर गुरुङसहितको टोली खटिने पार्टीले जानकारी दिएको छ ।

टोलीलाई पार्टी हार्नुका कारण र अब सुधारका लागि के गर्नुपर्छ भन्ने तथ्य खोजेर ल्याउने म्यान्डेट कार्यसम्पादन समितिको बैठकले दिएको तामाङले बताए । टोलीको अध्ययनपछि प्रतिवेदन तयार पारेर माघको पहिलो साता वीरगन्जमा बस्ने केन्द्रीय परिषद् बैठकमा पेस गरी पारित गर्ने तयारी राप्रपाको छ । प्रतिनिधिसभातर्फ प्रत्यक्षमा एक सिट जितेको राप्रपाले समानुपातिकतर्फ तीन प्रतिशत मत ल्याउन नसक्दा संसद्मा राष्ट्रिय दलको मान्यता नपाउने भएको छ ।

तपाईको प्रतिक्रिया

सम्बन्धित समाचारहरु

लोकप्रिय समाचारहरु