logo

bar

अष्टमी गुरुङ अात्महत्या प्रकरण : दूतावासले शुरु गर्यो दाेषीमाथि कारबाहीको पहल

लक्ष्मण खनाल युएई, १३ मंसिर | मङि्सर १३, २०७४

वैदेशिक रोजगारीको शिलशिलामा युएईमा आत्महत्या गरेको भनिएकी गोर्खा आरुघाटकी अष्टमी गुरुङको विषयमा नयाँ विवरण सार्वजनिक भएपछि नेपाली दूतावास युएईले दोषीमाथि कारबाहीका लागि पहल थालेको छ ।

बलात्कारको शिकार भएपछि गुरुङले आत्महत्या गरेको भन्ने भिडियो सार्वजनिक भएपछि नेपाली दूतावासले कारबाहीका लागि पहल सुरु गरेको हो ।

दूतावासका द्वितीयसचिव कृष्ण अर्यालले भिडियो सार्वजनिक भएलगत्तै स्थानीय प्रशासनको सहयोगमा कानुनी प्रक्रियाअगाडि बढाउन पहल सुरु भएको बताए ।

‘अष्टमीको भिडियोअनुसार उक्त कम्पनीमा कार्यरत आरोपी सुपरभाइजारहरूलाई युएईबाट बाहिर जान नसक्ने अवस्था बनाउन स्थानीय प्रशासनको सहयोगमा कम्पनीमा खबर गरिएको छ,’ उनले नयाँ पत्रिकासँग भने, ‘अब छिट्टै सम्पूर्ण प्रमाण जुटाएर छानबिन र कारबाहीको प्रक्रिया अगाडि बढाउँछौँ ।’

नोभेम्बर ४ का दिन आत्महत्या गरेकी गुरुङको शव १४ दिनपछि नेपाल लगेर अन्तिम संस्कार गरिसकिएको छ ।

तर, उनले प्रयोग गर्ने मोवाइमा उनका भाइले भिडियो भेटेपछि उक्त भिडियो नेपालबाट प्रसारण हुने एक टेलिभिजनले आफ्नो कार्यक्रममा प्रसारण गरेको थियो ।

यस्तो थियो भिडियोमा बयान
गुरुङ भाषामा अष्टमीले आफूलाई कम्पनीमा कार्यरत सुपरभाइजरले बलात्कार गरेको कुरा बताएकी छिन् ।

आफू बलत्कृत भएको, सबैकुरा गुमेको भन्दै बुवा आमासँग माफी मागेको भिडियोमा देख्न सकिन्छ । उनी विगत २० महिना पहिले काठमाडौंमा रहेको प्यारामाउन्ट म्यानपावर प्रालिबाट अबुधावीमा रहेको अरेबियन गल्फ क्लिनिङ कम्पनीमा वैदेशिक रोजगारीका लागि आएकी थिइन ।

कारबाहीका लागि चौतर्फी माग
भिडियो सार्वजनिक भएपछि युएईमा क्रियाशील विभिन्न नेपाली संघसंस्थाले गुरुङको परिवारले न्याय पाउनुपर्ने भन्दै आवाज उठाउन सुरु गरेका छन् ।

एनआरएन युएईको टोलीले पनि दूतावास पुगी दोषीलाई कारबाहीको पहल गर्न निवेदन दिएको थियो ।

त्यस्तै, नेपाली जनप्रगतिशील मञ्च युएईको अबुधावी क्षेत्रले दूतावास पुगेर घटनाको निष्पक्ष छानबिन गरी दोषीलाई कारबाही गर्न ज्ञापनपत्र बुझाएको छ ।

तपाईको प्रतिक्रिया

सम्बन्धित समाचारहरु

लोकप्रिय समाचारहरु