अभिनेता राजेश हमालकी पत्नी मधुलाई १०१ प्रश्न : बच्चा नजन्माउने योजनामा छौँ - Naya Patrika
© 2017 Naya Prakasan Pvt. Ltd.
अपडेट

संयुक्त राष्ट्रसंघ स्थापनाको ५० वर्ष (सन् १९९५ मा) पुगेको उपलक्ष्यमा नेपाल सरकारले बागमती किनारमा पार्क निर्माण गर्ने निर्णय गरेको २२ वर्ष पूरा  हुँदै छ । यो दुई दशकमा पार्क निर्माण…
पूरा पढ्नुहोस् »

दोस्रो चरणको स्थानीय तह निर्वाचनअन्तगर्त आज बिहान सात बजेदेखि विभिन्न ३५ जिल्लामा मतदान भइरहेको छ । ३३४ स्थानीय तहका लागि जनप्रतिनिधि चयन गर्न उत्साहका साथ मतदाताले मतदान गरिरहेका छन् ।…
पूरा पढ्नुहोस् »

मणिरत्न शाक्यले त्रिभुवन विश्वविद्यालयको जल तथा मौसम विज्ञान विभागबाट मौसम विज्ञान विषयमा ०३८ सालमा स्नातकोत्तर तहको पढाइ पूरा गरे । यो विभागको दोस्रो ब्याजमा मौसम विज्ञानमा उनै ‘टपर’ भए ।…
पूरा पढ्नुहोस् »

बोल्न सक्ने बच्चालाई टन्सिल भयो भने थाहा पाउन सकिन्छ । तर, बोल्न नसक्ने बच्चाहरूमा टन्सिल भएको थाहा पाउन कठिन हुन्छ । हाम्रो शरीरमा टन्सिलको पनि महत्वपूर्ण भूमिका हुन्छ । यसको…
पूरा पढ्नुहोस् »

झन्डै चार महिनापछि भएको बर्षाले डोल्पाली कृषकहरु उत्साहित भएका छन् । बर्षापछि जिल्लाका सुँ, ल्हाँ, सर्मी त्रिपुराकोट, पहाडा ,लिकु, कालिका, माझफाल, रह, तिप्ला, सहरतार, फोक्सुन्धो लगायत विभिन्न गाँउका कृषकहरु उत्साहित…
पूरा पढ्नुहोस् »

भारतको राजधानी नयाँदिल्ली नजिकैको एउटा गाँउलाई अमेरिकी राष्ट्रपति डोनाल्ड ट्रम्पको नाम राखिएको छ । उत्तरी हरियाणा प्रदेशको मेवात जिल्लाको मारोरा गाउँलाई ‘ट्रम्प गाउँ’ नामाकरण गरिएको हो । भारतीय प्रधानमन्त्री नरेन्द्र…
पूरा पढ्नुहोस् »

वेस्ट इन्डिजविरुद्धको पाँच खेलको एकदिवसीय सिरिजमा भारतले अग्रता लिएको छ । ट्रिनिडाडस्थित पोर्ट अफ स्पेनमा भएको दोस्रो खेलमा घरेलु टोली वेस्ट इन्डिजलाई १ सय ५ रनले पराजित गर्दै भारतले सिरिजमा…
पूरा पढ्नुहोस् »

नयाँ सरकार गठन हुँदा उद्योग मन्त्रालय कसैको अपेक्षामा पर्दैनथ्यो । प्रायः दलहरूले यसलाई सरोकारको मन्त्रालयका रूपमा राखेनन् । अहिले के स्थापित भयो भने चाहेको खण्डमा काम गर्न सकिन्छ । साथीहरूबाट…
पूरा पढ्नुहोस् »

राप्रपा नेपाल र राप्रपाबीच एकीकरण भएपछि अध्यक्ष बनेका कमल थापाको कार्यशैलीप्रति असन्तुष्टि जनाउँदै डा. प्रकाशचन्द्र लोहनीले एकीकृत राष्ट्रिय प्रजातन्त्र पार्टी (राष्ट्रवादी) गठन गरी अध्यक्ष बने । झन्डै चार दशक लामो…
पूरा पढ्नुहोस् »

भोलि प्रदेश नम्बर १, ५ र ७ मा स्थानीय तहको निर्वाचन हुँदै छ । राजनीतिक सहमतिको खोजी गर्दै पछि सर्दै जाँदा यो निर्वाचन १४ असारमा पुगेको हो । नेपालमा यसरी…
पूरा पढ्नुहोस् »

दललाई दिइएको निर्वाचन चिन्ह लिएर चिर्वाचनमा सहभागी हुन पाउने पाउनुपर्ने माग राख्दै नयाँ शक्ति पार्टी, नेपाल सहितका व्यवस्थापिका संसद बाहिर रहेका ६६ दलले दलहरुले आइतबार निर्वाचन आयोगमा धर्ना दिएका छन्…
पूरा पढ्नुहोस् »

नयाँ पत्रिका   |   असार ०३, २०७४

नेपाली सिने उद्योगका स्टार नायक हुन् राजेश हमाल । ०४६ सालमा ‘युगदेखि युगसम्म’बाट चलचित्र क्षेत्रमा प्रवेश गरेका उनले अहिलेसम्म झन्डै तीन सय सिनेमामा अभिनय गरिसकेका छन् । त्यसमध्ये ४० प्रतिशत सिनेमा हिट रहेको उनको दाबी छ । नेपाली सिनेमा र उद्योगलाई व्यावसायिक बनाउन पनि हमालको महत्वपूर्ण भूमिका छ । लामो समय एक्लै रहेका उनले तीन वर्षअघि मात्रै बिहे गरे । चलचित्र क्षेत्रमा अढाई दशकभन्दा लामो समय बिताइसकेका हमाल वेला–वेलामा विवाद र चर्चामा पनि आइरहन्छन् । अभिनेता हमालका बानी र स्वभावबारे पत्नी मधु भट्टराईलाई नयाँ पत्रिकाका खगेन्द्र पन्तले १०१ प्रश्न सोधेका छन्:

अभिनेता हमालका बानी र स्वभावबारे पत्नी मधु भट्टराईलाई १०१ प्रश्न सोध्दै नयाँ पत्रिकाका खगेन्द्र पन्त

 

पहिलो भेटमा ‘डान्स गरौँ’ भन्नुभयो

१. पहिलोपल्ट कहाँ भेट भयो दुईजनाको ?

हयात होटेलमा आयोजित लक्स ब्युटी स्टार कन्टेस्टमा म सहभागी थिएँ । उहाँ त्यो कार्यक्रमको जज हुनुहुन्थ्यो । पहिलोपटक त्यहीँ भेट भएको हो ।

२. बोलचाल पहिलो भेटमै भयो कि पछि ?

त्यही कार्यक्रममै भयो । उहाँले मलाई जजका रूपमा प्रश्न सोध्नुभएको थियो । कार्यक्रम सकिएपछि भएको पार्टीमा ‘डान्स गरौँ’ भन्नुभयो । हिल जुत्ताले मेरो खुट्टामा घाउ भएको थियो, ‘नाच्न सक्दिनँ’ भनेँ । छुट्टिने वेला उहाँले आफ्नो कार्ड दिनुभयो ।

३. त्यसपछि कहिले भेट भयो त  ?

पाँच–सात दिनपछि मैले उहाँको नम्बरमा फोन गरेँ । संयोगले त्यसको भोलिपल्ट उहाँको जन्मदिन रहेछ । झापातिर हुनुहुन्थ्यो । उहाँले ‘भोलि काठमाडौं फर्किंदै छु, भोलि मेरो जन्मदिन पनि हो, सँगै डिनर गरौँ’ भन्नुभयो । म पनि तयार भएँ । हाम्रो पहिलो डेटिङ नै त्यही हो ।

४. कहाँ भेट्नुभयो ?

सांग्रिला होटेलमा भेटेर डिनर गर्यौँ, धेरैबेर बस्यौँ । म त्यतिवेला महालक्ष्मीस्थान बस्थेँ, उहाँले मलाई ड्रप गरिदिनुभयो ।

५. प्रेम प्रस्ताव कसले पहिला राख्नुभयो ?

हामीले प्रेम प्रस्ताव नै राख्नुपरेन । व्यवहारबाटै एक–अर्काले बुझ्यौँ ।

६. डेटिङ कत्तिको गर्नुहुन्थ्यो ?

सांग्रिलाको भेटघाटपछि म धरान फर्किएँ, फोनमा, इमेलमा कुराकानी भइरहन्थ्यो । काठमाडौं आउँदा वेलावेला डिनर, लन्च सँगै गर्ने गरी भेटघाट गथ्र्यौँ ।

 ७. कसैले थाहा पाउला भन्ने डर कत्तिको लाग्थ्यो ?

त्यस्तो डर लाग्दैनथ्यो । 

८. तपार्इंहरूले बिहे कहिले गर्नुभयो ?

१० जेठ ०७१ मा हामीले प्रेमविवाह गरेका हौँ ।

९. उहाँले सुहागरातको फोटो पनि सामाजिक सञ्जालमा राख्नुभयो नि ?

(हाँसो) राख्नुभएको रहेछ, तर मलाई थाहा थिएन । लन्डनमा दिदी हुनुहुन्छ, उहाँले फोन गरेर भनेपछि मात्रै मैले थाहा पाएँ ।

१०. तपाईंसँग सल्लाह गर्नुभएको थिएन र ?

फोटो खिचेको त थाहा छ, तर राखेको थाहा थिएन । सायद उहाँले आफ्ना फ्यानहरूलाई सन्देश दिन त्यो फोटो राख्नुभएको थियो होला ।

११. घरपरिवार, आफन्त, शुभचिन्तकबाट बच्चा कहिले पाउने भन्ने चासो कत्तिको व्यक्त हुन्छ ?

हुन्छ । सोध्न थालेका छन् सबैले । 

१२. उहाँहरूको चाहना कहिलेसम्म पूरा हुन्छ त ?

यसबारे त हामीले अहिलेसम्म सोचेकै छैनौँ । सोच्दैनौँ पनि होला त्यतातिर । अहिलेसम्मको हाम्रो कुराकानी–छलफलअनुसार हामी बच्चा नपाउने योजनामै छौँ । टाइम म्यानेजमेन्टका कारणले मात्रै हामीले बच्चा नपाउने सोचेका हौँ । 

अहिलेसम्मको हाम्रो कुराकानी–छलफलअनुसार हामी बच्चा नपाउने योजनामै छौँ । टाइम म्यानेजमेन्टका कारणले मात्रै हामीले बच्चा नपाउने सोचेका हौँ । 

बेडमा गयो कि निदाउनुहुन्छ

१३. बिहान कति बजे उठ्नुहुन्छ ?

सात बजेभित्र उठिसक्नुहुन्छ ।

१४. चिया–कफी के रुचाउनुहुन्छ ?

उठ्नेबित्तिकै एक लिटर पानी खानुहुन्छ । चिया त उहाँले खानुहुन्न । गाईको दूध पाइयो भने मात्रै चिया खानुहुन्छ ।

१५. एक्सरसाइज कत्तिको गर्नुहुन्छ ? 

समय पाउनुभयो भने नियमित गर्नुहुन्छ । घरमै जिमका सामान छन् । धेरैजसो साँझमा एक्सरसाइज गर्नुहुन्छ । 

१६. योगा पनि गर्नुहुन्छ ? 

योगा, ध्यान त्यस्तो गर्ने त होइन, तर कहिलेकाहीँ युट्युबमा हेरेर आनन्द लिनुहुन्छ ।

१७. राति कतिखेर सुत्नुहुन्छ ?

काम हेरेर हुन्छ । सामान्यतया ११ बजेभित्र निदाउनुहुन्छ । बेडमा गयो कि निदाइहाल्नुहुन्छ । बेडमा कतिखेर आउनुहुन्छ भन्ने मात्रै हो । 

सामान्यतया ११ बजेभित्र निदाउनुहुन्छ । बेडमा गयो कि निदाइहाल्नुहुन्छ । बेडमा कतिखेर आउनुहुन्छ भन्ने मात्रै हो । 

मृत्युको समाचारले दुःखी बनायो

१८. पत्रपत्रिका कत्तिको पढ्नुहुन्छ ?

पाएसम्म पढ्नुहुन्छ ।

१९. टेलिभिजनमा समाचार कत्तिको हेर्नुहुन्छ ?

टेलिभिजन त्यति हेर्नुहुन्न । अचेल अनलाइनहरूमै धेरै समाचार हेर्नुहुन्छ ।

२०. आफ्नोबारेमा आएका समाचार हेरेपछि कस्तो प्रतिक्रिया जनाउनुहुन्छ ? 

उहाँको अचम्मको बानी छ । कुनै रियाक्ट नै गर्नुहुन्न । समाचार पढेर न खुसी देखिनुहुन्छ, न दुःखी नै । केही दिनअघि ‘राजेश हमालको मृत्यु’ भनेर कसले समाचार हालिदिएछ । त्यसले भने हाम्रा आफन्त र उहाँका फ्यानहरूलाई समेत दुःखी बनायो । 

२१. त्यस्तो समाचार आएपछि के भन्नुभयो त ?

उहाँले त केही भन्नुभएन । हामी त्यही दिन संयोगले डिनरका लागि बाहिर गएका थियौँ । उहाँले फ्यानहरूका लागि हाम्रो फोटो सामाजिक सञ्जालमा राख्नुभयो । 

खाजामा सात–आठ प्रकारका फलफूल

२२. बिहानको खाजामा के रुचानुहुन्छ ?

सात–आठ प्रकारका फलफूल खानुहुन्छ, कहिल्यै छुट्दैन । त्यससँगै तीनवटा उसिनेका अन्डा खानुहुन्छ । 

२३. खानामा के मन पराउनुहुन्छ ?

साग, सलाद, दाल, चिकेन, तरकारी खानुहुन्छ ।

२४. भात, रोटी खानुहुन्न ?

उहाँले भात नखाएको त वर्षौँ भइसक्यो । रोटी पनि खानुहुन्न । 

२५. दिउँसो खाजा के खानुहुन्छ ?

दुई बजे लन्च लिन्छौँ । चार बजेपछि हल्का फलफूल लिनुहुन्छ ।

२६. रातिको खानामा के खानुहुन्छ ?

सुप, सलाद, फलफूल लिनुहुन्छ ।

२७. घरमा खाना कसले पकाउँछ ?

मैले नै पकाउँछु । तेल अत्यन्त कम राखेर, नुन नराखेर खाना बनाउँछु ।

२८. नुन पनि खानुहुन्न ?

अहँ, खानुहुन्न । कहिलेकाहीँ अचारमा नुन राख्छु । थोरै खानुहुन्छ ।

२९. खानामा कमेन्ट गर्ने स्वभाव कत्तिको छ ?

केही पनि गर्नुहुन्न । खानामा मात्रै होइन, कुनै चिजमा पनि कमेन्ट गर्ने बानी छैन ।

३०. खाना मीठो–नमिठो भएको केही पनि नभन्दा कहिलेकाहीँ रिस उठ्दैन ?

म पनि पकाउन एक्सपर्ट होइन, त्यसैले कमेन्ट नगरे पनि खासै नराम्रो लाग्दैन ।

३१. कहिलेकाहीँ किचनमा पस्नुहुन्छ कि पस्नुहुन्न ?

आउन त आउनुहुन्छ, तर केही गर्नुहुन्न । मलाई पनि उहाँ किचनमा आएको मन पर्दैन ।

३२. खाना पकाउन कति रुचि देखाउनुहुन्छ ?

खाना पकाउन त कत्ति पनि रुचि छैन ।

३३. पकाउन आउँछ कि आउँदैन उहाँलाई ?

आउँदैनजस्तो लाग्छ । कलेज पढ्दाचाहिँ चाउचाउहरू पकाउनुहुन्थ्यो रे ।

३४. भनेपछि उहाँले पकाएको तपाईंले अहिलेसम्म केही खान पाउनुभएको छैन ?

अमलेट खाएकी छु ।

३५. तपाईंले पकाएको कुन परिकार उहाँले सबैभन्दा मीठो मान्नुहुन्छ ?

हरियो साग, बोइल्ड मटन, चिकेन मन पराउनुहुन्छ

३६. तपाईंले पकाउन सिक्ने सल्लाह दिनुहुन्न ?

अहिलेसम्म त दिइएको छैन, अब सोच्नुपर्ला । उहाँको जेमा इन्ट्रेस्ट छ, त्यसमै छाडिदिन्छु । ह्यान्डसम हुनुहुन्छ, जे लगाए पनि सुहाउँ

३७. आफूले लगाउने लुगामा कत्तिको सचेत हुनुहुन्छ ?

उहाँले जस्तो लुगा लगाए पनि राम्रो देखिन्छ । सचेत पनि हुुनुहुन्छ ।

३८. के लगाउन रुचाउनुहुन्छ ?

टी–सर्ट, सर्ट, जिन्स मन पराउनुहुन्छ । औपचारिक कार्यक्रममा जाँदा सुट पनि लगाउनुहुन्छ ।

३९. तपाईंले कस्तो लुगामा राम्रो देख्नुहुन्छ ?

उहाँको पर्सनालिटी नै राम्रो छ । मिलेको अनुहार, राम्रो हाइट–जिउडाल, त्यसमाथि लोभलाग्दो हाँसो । ह्यान्डसम हुनुहुन्छ, जे लगाए पनि म त राम्रो नै देख्छु । 

४०. पहिरनको विषयमा तपाईंले सल्लाह कत्तिको दिनुहुन्छ ?

आफैँ भएर केही भन्दिनँ, उहाँले सोधेपछि मात्रै सल्लाह दिन्छु । तर, लुगा लगाउँदा उहाँ आफैँ जिस्किनुहुन्छ । ‘कुन लुगा लगाऊँ ?’ ‘कुन लुगामा राम्रो देखिन्छु’, ‘यो ड्रेसमा त ह्यान्डसम देखिएँ है’ भनेर जिस्किनुहुन्छ

४१. तपाईंको पहिरनबारे उहाँले कत्तिको सल्लाह दिनुहुन्छ ?

म आफैँ सोध्छु उहाँलाई । उहाँले पनि सल्लाह दिनुहुन्छ

४२. तपाईंको पहिरनको कत्तिको तारिफ गर्नुहुन्छ ?

मुखले खुलेर त तारिफ गर्नुहुन्न, तर उहाँको हेराइबाटै थाहा हुन्छ, ‘आज त राम्रै देखिएछु’ भन्ने ।

४३. कस्ता लुगा लगाउन सुझाब दिनुहुन्छ ?

तिमीलाई जुन लुगामा रुचि छ, मन परेको छ, त्यो लगाऊ भन्नुहुन्छ । यही लगाउनुपर्छ वा यस्तो लगाउनुहुन्न भन्ने हुन्न उहाँको

४४. लुगामा आइरन गर्न जान्नुहुन्छ कि जान्नुहुन्न ?

मैले त अहिलेसम्म आइरन लगाएको देखेको छैन । कलेज पढ्दा लगाउनुहुन्थ्यो कि । सर्टहरूमा कहिलेकाहीँ मैले नै गरिदिन्छु ।

४५. आफूले लगाउने लुगा आफैँ किन्नुहुन्छ कि अरूले किनिदिनुपर्छ ?

विदेश जाँदा एक सुटकेस भरेर एकैपटक ल्याएर आउनुहुन्छ ।

४६. तपाईंलाई सपिङ गर्न कत्तिको सघाउनुहुन्छ ?

उहाँलाई अल्छी लाग्छ । एकपटक बैंककमा भने एकछिनका लागि भए पनि जानुभएको थियो, तर हतारो भयो भन्नुभयो । काठमाडौंमा हुँदा मलाई पसलसम्म ड्रप गर्नुहुन्छ । 

घरखर्च ७०–८० हजार 

४७. आफ्नो आम्दानी तपाईंलाई दिनुहुन्छ कि आफैँ राख्नुहुन्छ ?

ल्याएर टेबुलमा राख्नुहुन्छ, अनि मैले नै राखिदिन्छु । घरमा एउटै ठाउँमा राख्ने गरिन्छ पैसा, आवश्यकताअनुसार जसलाई चाहिन्छ, उसले चलाउँछ ।

४८. आफूले खल्तीमा कम्तीमा कति बोक्नुहुन्छ ?

९–१० हजारजति बोक्नुहुन्छ ।

४९. घरखर्च चलाउन कति चाहिन्छ भन्ने उहाँलाई थाहा हुन्छ कि हुँदैन ?

पहिला त हुँदैनथ्यो होला, बिहेपछि थाहा पाउन थाल्नुभएको छ (हाँसो) । मैले भन्ने गरेकी हुन्छु नि त यति खर्च भयो भनेर ।

५०. महिनामा कति रकम चाहिँदो रहेछ राजेश हमालको घर चल्न ?

कम्तीमा ४० हजारजति त खानामा मात्रै खर्च हुन्छ । घरखर्चका लागि मात्रै कम्तीमा ७०–८० हजार चाहिन्छ । 

५१. उहाँको धेरै खर्च केमा हुन्छ ?

खानामा धेरै हुन्छ । एकदम स्तरीय खाना रुचाउनुहुन्छ ।

५२. उहाँको नाममा बैंक ब्यालेन्स कति छ भन्ने तपाईंलाई थाहा छ कि छैन ? 

थाहा छैन । थाहा भए पनि किन बताऊँ ? (हाँसो)

५३. बताउनुस् भनेको होइन, तपाईंलाई थाहा छ कि छैन भनेर सोधेको हो ।

सबै त थाहा छैन, एउटा बैंकको चाहिँ थाहा छ (हाँसो) । त्यो पनि उहाँले बताएर होइन, मैले बैंकको स्टेटमेन्ट हेरेर थाहा पाएकी हुँ ।

५४. उहाँलाई थाहा नदिएर हेर्नुभएको ?

बैंक स्टेटमेन्टहरू उहाँले एउटा ब्यागमा राख्नुहुन्छ, मैले ब्याग खोलेर हेरेकी थिएँ । पछि उहाँले ‘मेरा कागजपत्र किन हेछ्र्यौ, नचलाऊ न’ भन्नुभयो

५५. पैसाको बारेमा परिवारमा कहिल्यै किचलो भएको छ कि छैन ?

कहिल्यै भएको छैन त्यस्तो त । 

उहाँको रिस डेन्जर छ

५६. रिसाउने बानी कति छ ?

रिसाउनुहुन्न । तर, रिसाएपछि उहाँको रिस डेन्जर छ, निकै डर लाग्छ । उहाँको भन्दा म नै धेरै रिसाउँछु

५७. कस्ता कुरामा रिसाउनुहुन्छ ?

उहाँका सामान चलायो भने रिसाउनुहुन्छ । एकपटक हाम्रो बिहे नहुँदै उहाँलाई नसोधीकन किताब लिएर गएकी थिएँ, थाहा पाएपछि निकै कराउनुभयो ।

५८. रिसाएपछि के गर्नुहुन्छ ?

कराउने गर्नुहुन्छ । अरुबेला भने निकै कुल हुनुहुन्छ । मनै परेन भने धेरै दिन नबोलेर पनि बस्न सक्नुहुन्छ ।

५९. रिसाएपछि कसले पहिला फकाउँछ ?

मैले नै फकाउनुपर्छ नि । उहाँ त फकाउने नै गर्नुहुन्न । नबोलेरै आठ–नौ दिनसम्म पनि बस्न सक्नुहुन्छ । तर, मलाई छटपटी हुन्छ, अनि फकाउँछु । म रिसाएँ भने पनि उहाँ झन् डबल रिसाउनुहुन्छ, अनि मैले नै फकाउनुपर्छ ।

६०. के भनेर फकाउनुहुन्छ ?

उहाँको गल्ती रहेछ भने सम्झाउने कोसिस गर्छु । हग गर्छु, किस गर्छु (हाँसो), त्यही त हो नि

६१. बाहिरको रिस घरमा कत्तिको रिफ्ल्याक्ट हुन्छ ?

त्यो त कहिल्यै गर्नुहुन्न । बाहिर काम गर्दा तनाव हुन्छ होला । तर, अहँ, घरमा केही देखाउनुहुन्न । बरु, हाँसेर बस्नुहुन्छ

६२. परिवारका सदस्यलाई गाली कत्तिको गर्नुहुन्छ ?

उहाँका सामान चलायो, रुटिन डिस्ट्रब भयो भने रिसाउनुहुन्छ ।

६३. तपाईंलाई कहिल्यै पिट्नुभएको छ कि छैन ?

छैन ।

६४. तपाईंले नि ?

कहिलेकाहीँ जिस्केर ‘तपाईं कत्तिको स्ट्रोङ हुनुहुन्छ’ भनेर मुड्कीले हान्छु ।

 ६५. माया गरेर तपाईंलाई के भनेर बोलाउनुहुन्छ

(हाँसो), बाहिर त ‘मधु’ भनेर बोलाउनुहुन्छ, जिस्क्याएर जे पायो त्यही भन्नुहुन्छ । तपाईंलाई बताउनै मिल्दैन ।

(हाँसो), बाहिर त ‘मधु’ भनेर बोलाउनुहुन्छ, जिस्क्याएर जे पायो त्यही भन्नुहुन्छ । तपाईंलाई बताउनै मिल्दैन ।

६६. तपाईंले नि ?

‘राजा’ भन्छु । ठकुरीहरूमा राजा नै चल्छ ।

बर्थ डे विस गर्नुहुन्न

६७. तपाईंलाई उपहार कत्तिको दिनुहुन्छ

बिहेअघि दिनुहुन्थेन, बिहेपछि वेला–वेलामा दिनुहुन्छ

६८. उपहारमा कस्ता चिजहरू दिनुहुन्छ

ब्याग, जुत्ता, सनग्लास, पफ्र्युमलगायतका सामान दिनुहुन्छ । एकपटक उहाँले ल्याइदिएको लुगा फिट भएन । त्यसपछि लुगा कम ल्याउनुहुन्छ ।

६९. जन्मदिन, म्यारिज एनिभर्सरी, भ्यालेन्टाइन डेमा विस गर्नुहुन्छ कि बिर्सनुहुन्छ ?

विस गर्नुहुन्न, तर सरप्राइज दिएर बाहिर लैजानुहुन्छ । खासमा मैले बर्थडे सेलिब्रेट नै गर्दिनँ । भ्यालेन्टाइन डे घरमै मनाउँछौँ, सबै भ्यालेन्टाइन डे छ (हाँसो) । एनिभर्सरीमा उहाँलाई मन पर्ने परिकार पकाएर सेलिब्रेट गर्छौँ ।

७०. उहाँले ल्याइदिएको तपाईंलाई सबैभन्दा मन परेको उपहार कुन हो ?

उहाँले दिनुभएका सबै उपहार मन पर्छन्, सबै राखेकी पनि छु ।

७१. तपाईंले कत्तिको दिनुहुन्छ ?

बिहेअघि त दिन्थेँ । तर, अचेल दिएको छैन (हाँसो)

७२. तपाईंले दिएको उहाँले एकदमै मन पराएको उपहार कुन हो ?

बिहेअघि नै साइकल गिफ्ट गरेकी थिएँ । उहाँले धेरै चलाउनु पनि भयो । 

२५–३० को उमेरमा बियर धेरै खानुभयाे

७३. चुरोट–खैनी खानुहुन्छ कि खानुुहुन्न ?

खानुहुन्न

७४. कहिल्यै खानुभएन, कि छोडेको ?

कहिल्यै खानुभएन रे ।

७५. रक्सी कत्तिको खानुहुन्छ ?

२५–३० वर्षको उमेरसम्म बियर धेरै खानुहुन्थ्यो रे । अचेल खानुहुन्न । कहिलेकाहीँ पार्टीमा वाइनको गिलास हातमा लिनुहुन्छ । मलाई खान मन लाग्यो र खाऊँ भन्यो भने एक गिलाससम्म वाइन खानुहुन्छ ।

७६. दुईजना मातेर कहिलेकाहीँ ठाकठुक कत्तिको पर्छ ?

मात्ने गरी कहिल्यै खाएको थाहा छैन । घरमा खाँदा त सधैँ रोमान्टिक मात्रै हुन्छौँ ।

लुगा कहिल्यै धुनुभएन

७७. सहयोगी कत्तिको हुनुहुन्छ ?

घरायसी काममा बाहेक सल्लाह–सुझाब दिने तथा अरू काममा सहयोग गर्नुहुन्छ ।

७८. कहिल्यै तपाईंका लुगा धोइदिनुभएको छ ?

(हाँसो) आफ्नो त धुनुहुन्न, मेरो लुगा के धोइदिनुहुन्थ्यो र !

७९. घरमा सहयोग माग्नेहरू कत्तिको आउँछन् ?

एकदम धेरै आइरहेका हुन्छन्

 ८०. कस्तो सहयोग माग्ने धेरै हुन्छन् ?

कतिले काममा लगाइदिनुपर्यो भन्छन्, कोही पैसा माग्ने पनि हुन्छन् । फेसबुकबाट ‘मलाई घरमा काम गर्न राख्नुपर्यो’ भन्ने केटीहरू पनि हुन्छन्

८१. राख्नुभएको छ त त्यस्ता केटीहरूलाई ?

फेसबुकबाट त्यस्तो भन्ने केटीहरूको कसरी विश्वास गर्न सकिन्छ र ? काम गर्ने कि फेसबुक चलाएर बस्ने ? अचेल सबैलाई कहाँ विश्वास गर्न सकिन्छ ।

८२. पैसा माग्नेलाई कत्तिको सघाउनुहुन्छ ?

सकेको सहयोग गर्नुहुन्छ ।

राम्रो नाच्न आउँदैन

८३. सिनेमा हेर्न कति मन पराउनुहुन्छ ?

हेर्नुहुन्छ, तर हलमै गएर प्रायः कम हेर्नुहुन्छ । 

८४. कस्ता सिनेमा रुचाउनुहुन्छ ?

रियालिस्टिक । लाइफस्टाइलसँग जोडिएका सिनेमा मन पराउनुहुन्छ

८५. बुढाबुढी हलमै पुगेर सिनेमा कत्तिको हेर्नुहुन्छ ?

कहिलेकाहीँ जान्छौँ ।

८६. टेलिभिजनमा सिरियल हेर्नुहुन्छ कि हेर्नुहुन्न ?

हेर्नुहुन्न, न्युज मात्रै हेर्नुहुन्छ । म पनि हेर्दिनँ ।

८७. गीत कत्तिको सुन्नुहुन्छ ?

त्यति धेरै त सुन्नुहुन्न । एउटा अंग्रेजी गीत छ, उहाँले वेला–वेला सुन्नुहुन्छ

८८. नाँच्न आउँछ कि आउँदैन ?

त्यति धेरै त आउँदैन, तर त्यस्तै मन पर्छ मलाई ।

८९. तपाईं राम्रो नाच्नुहुन्छ कि उहाँ ?

म त झन् उहाँको जत्ति पनि जान्दिनँ ।

पत्रकारले चिनेनन्, विदेशी केटी भने

९०. देशको स्टार कलाकार हुनुहुन्छ ?

महिला फ्यान पनि धेरै होलान् नि ? धेरै छन् नि ।

९१. उनीहरूको बारेमा तपाईंलाई बताउनुहुन्छ कि बताउनुहुन्न ?

सबै कुरा भन्नुहुन्न । सधैँ मलाई बताएर साध्य पनि हुँदैन ।

९२. महिला फ्यानले पेटमा बच्चा चिनो दिनसमेत प्रस्ताव गरेको उहाँले नै मिडियालाई बताउनुभएको छ । अरू धेरै प्रेम प्रस्ताव गर्ने फ्यानहरू पनि होलान् । तपाईंले चासो दिनुहुन्न ?

बिहे हुनुभन्दा पहिला त चासो राख्थे, तर अचेल धेरै कम भएको छ । शंका लाग्ने तरिकाले चाहिँ कहिल्यै सोचिन्न ।

९३. बिहेअघि चाहिँ किन नि ?

चिन्ता हुन्थ्यो नि यत्रो सुपरस्टार मान्छे । प्रेमप्रस्ताव राख्ने थुप्रै केटीहरू हुन्छन्, बिहे पनि भएको छैन, आफू असुरक्षित त छैन भन्ने चिन्ता लाग्ने रहेछ क्या । सबैलाई लाग्छ नि यस्तो चिन्ता त ।

९४. तपाईंहरूको अफेयर लामो समय गुपचुपमै रह्यो नि, मिडियाबाट कसरी बच्नुभयो ?

हामी सँगै हुँदा पनि मिडियाका साथीहरूले देखेका हुन्थे । फोटोहरू पनि खिचेका थिए । तर, म केही बोलिनँ । उनीहरूले हामीलाई चिनेनन् । बरु, भोलिपल्ट ‘राजेश हमाल विदेशी केटीसँग देखिए’ भनेर समाचार आयो । समाचार पढेर आफैँलाई खुब हाँसो लाग्यो ।

९५. बिहेअघि उहाँको नाम धेरै महिलाहरूसँग पनि जोडिएको थियो नि ?

उहाँको राम्रो बानी के छ भने पहिला उहाँसँग अफेयर भएकाहरूको बारेमा पनि सबै बताउनुभएको थियो । त्यस्तो सम्बन्ध भएका एक–दुईजना मात्रै हुनुहुन्थ्यो, दुवै जना विदेशी हुनुहुन्थ्यो । दुवैलाई म चिन्छु ।

९६. नेपाली सिने क्षेत्रकै हिरोइनहरूसँग पनि उहाँको नाम जोडियो नि ?

नाम त जोड्नेले अहिले पनि जोडिरहेका हुन्छन् नि । समाचार–गसिपमा आउने त्यस्ता कुराहरू मैले पनि सुनेकी हुन्छु । तर, उहाँले हाम्रो रिलेसनलाई अप्ठ्यारो नपार्ने सबै कुरा बताउनुभएको छ । उहाँ त्यस्तो मान्छे होइन ।

९७. यस्तै कुराले बुढाबुढीबीच कहिल्यै खटपट परेको छ कि छैन ?

छैन । 

९८. उहाँको न्युड फोटो पनि सार्वजनिक भयो नि एकपटक ?

थाहा छ, उहाँले नै बताउनुभएको थियो । डाक्टरलाई देखाउन उहाँले फोटो खिच्नुभएको फोटोको नेगेटिभ घरबाटै थाहा नदिएर लगिएको हो रे।

राजनीतिप्रति धेरै चासो छ 

९९. घरमा भएका वेला राजनीतिक कुराकानी कत्तिको गर्नुहुन्छ ?

उहाँलाई राजनीतिमा एकदमै रुचि छ । कुराकानी पनि गर्नुहुन्छ । मलाई पहिला केही थाहा हुँदैनथ्यो, रुचि पनि थिएन । अचेल उहाँले भनेपछि बुझ्न थालेकी छु ।

१००. तपाईंको कुरा कत्तिको मान्नुहुन्छ ?

भन्न त जे कुरामा पनि ‘ओके’ भन्नुहुन्छ । तर, आफूलाई ठीक लागेको गर्नुहुन्छ । मैले भनेको पनि गर्नुहुन्छ, तर समय लगाउनुहुन्छ । मलाई तत्काल हुनुपर्ने हुन्छ ।

१०१. रोमान्टिक कत्तिको हुनुहुन्छ ?

एकदम रोमान्टिक हुनुहुन्छ । बरु, म मुढी छु । घरमा त उहाँ जतिवेला पनि रोमान्टिक मुडमा देखिनुहुन्छ । जिस्क्याउने, नाचेर देखाउने, जोक सुनाउने गर्नुहुन्छ । एक्सरसाइज गर्दा सास फुल्यो भने गीत गुनगुनाउन थाल्नुहुन्छ । तर, यही गीत भन्ने हुँदैन, आफैँ बनाएर फन्नी गाउनुहुन्छ ।