चितवनका राजनीतिक अगुवासँग नयाँ पत्रिका
© 2017 Naya Prakasan Pvt. Ltd.

भारतसँगको सन्धि–सम्झौता पुनरावलोकन गर्न प्रधानमन्त्रीलाई सुझाब – प्रधानमन्त्री शेरबहादुर देउवाको आसन्न भारत भ्रमणमा राष्ट्रहितविपरीत सन्धि–सम्झौता हुनसक्ने भन्दै सांसदहरूले खबरदारी गरेका छन् । संसद्को उद्योग वाणिज्य तथा उपभोक्ता हित संरक्षण समितिले…
पूरा पढ्नुहोस् »

संविधान संशोधन र आसन्न निर्वाचनका विषयमा प्रधानमन्त्री शेरबहादुर देउवाको आह्वानमा पटकपटक वार्ता र छलफल भयो । पहिला कांग्रेस, एमाले र माओवादीबीच लामो छलफल भयो भने तत्पश्चात प्रमूख दलका नेताहरुसहित राजपा…
पूरा पढ्नुहोस् »

अभिनेत्री सन्नी लियोनका फ्यान भारतमा निकै छन् । अभिनेत्रीका साथै आइटम गर्लका रूपमा पनि पहिचान बनाएकी सन्नी जहाँ जान्छिन्, त्यहाँ उनलाई हेर्न दर्शकहरूको भिड लाग्ने गर्छ । सन्नी हालै एउटा…
पूरा पढ्नुहोस् »

सरकारले प्राथमिक स्वास्थ्य केन्द्रका लागि आवश्यक पर्ने उपकरण वितरण सुरु गरेको छ । देशभर रहेका १५ वेड क्षमताका १ सय २० प्राथमिक स्वास्थ्य केन्द्रमा चिकित्सकलाई उपचारमा आवश्यक पर्ने उपकरण वितरण…
पूरा पढ्नुहोस् »

  लस याम्र्बसमा भ्यानले सर्वसाधारणलाई आक्रमण गर्न थालेपछि मानिस नजिकैका क्याफे तथा पसलभित्र लुकेर ज्यान जोगाएका थिए । नायिका लैला रौउअसले आक्रमणबाट बच्न एउटा रेस्टुरेन्टको फ्रिजभित्र लुक्नुपरेको बताएकी छिन् ।…
पूरा पढ्नुहोस् »

२०औँ राष्ट्रिय पौडी च्याम्पियनसिपमा गौरिका सिंह व्यक्तिगत र टिम स्पर्धा गरी समग्रमा ३५औँपटक कीर्तिमान आफ्नो नाममा लेखाउन सफल भइन् ओलम्पियन पौडीबाज गौरिका सिंहले ३५औँपटक राष्ट्रिय कीर्तिमान बनाएकी छिन् । सातदोबाटोको…
पूरा पढ्नुहोस् »

पृष्ठभूमि बुद्धशासनको विस्तारका लागि जम्बुुद्वीपभित्रका विभिन्न राजाले बुद्धलाई यथेष्ट सघाएका थिए । बुद्ध परिनिर्वाणको तीन सय वर्ष बितिसक्दासम्म पनि उनको शासनलाई सघाउने राजा प्रशस्त मात्रामा देख्नमा आएका थिए । यसबीच…
पूरा पढ्नुहोस् »

मनीषा कोइराला अर्थात् विरोधाभाषपूर्ण जीवनकी पात्र । कोइराला परिवार नेपालको राजनीतिक खानदान हो, तर त्यही खानदानकी छोरी मनीषाले आफ्नो जीवन राजनीतिमा होइन, फिल्ममा उतारिन् । सामन्यतया चेलीहरूलाई सानो हुँदा माइतीमा…
पूरा पढ्नुहोस् »

यसपालि नेपालको तराईका कैलालीदेखि झापासम्मका जिल्ला एकैपटक बाढी र डुबानको चपेटामा परे । यस्तो कमै हुन्थ्यो । पूर्वी नेपालमा पानी पर्दा पश्चिमतिर पर्दैनथ्यो । मध्य भागमा बाढी आउँदा पूर्व र…
पूरा पढ्नुहोस् »

नयाँ पत्रिकाको न्युजरुममा आज उद्योग वाणिज्य महासंघकी अध्यक्ष भवानी राणासँग अन्तरक्रिया हुँदैछ । मुलुकको विकासमा निजी क्षेत्रका योगदान कति भन्ने विषयमा अन्तरक्रिया केन्द्रित हुँदैछ । अन्तरक्रिया फेसबुक लाइभ हेर्न तलको लिंकमा…
पूरा पढ्नुहोस् »

नयाँ पत्रिका   |   बैशाख ०८, २०७४

नयाँ पत्रिका दैनिकले भरतपुरमा आयोजना गरेको ‘स्थानीय निर्वाचन : स्थानीय एजेन्डा’ राउन्ड टेबलमा जिल्लास्थित दलका नेताले आ–आफ्ना एजेन्डाको व्याख्या गरेका छन् । भरतपुर महानगरपालिकाको विकासका लागि चितवनका राजनीतिक दलका प्रायः मुद्दा साझा छन् । दलहरूले सुुकुम्बासी समस्या, नारायणी नदीको कटान रोक्ने, सडकको स्तरोन्नति, अव्यवस्थित सहरीकरण तथा बसोवासलाई नियन्त्रण गर्नेलगायतका मुद्दा उठाएका छन् । राउन्ड टेबलमा उपस्थित दलका नेताले आफूहरू भरतपुर महानगरपालिकाको समृद्धिमा एक ठाउँमा रहेको बताए । उनीहरूले राखेका बुँदागत टिप्पणी पनि साझा छन् ।

प्रस्तुति : योगेश ढकाल, सुदीप सिवाकोटी
तस्बिर : कृष्ण पौड्याल/नयाँ पत्रिका

राजीव न्यौपाने जिल्ला सचिव, कांग्रेस

व्यवस्थित बसोवास प्रमुख एजेन्डा
पछिल्लो समय चितवनको जनसंख्या ह्वात्तै बढेको छ । त्यही कारणले भरतपुर महानगरपालिकामा अव्यवस्थित बस्ती बसिरहेको छ । यसले महानगरलाई सुन्दरभन्दा बढी कुरूप बनाइरहेको छ । व्यवस्थित बसोवास प्रमुख एजेन्डा बन्नुपर्छ भन्ने हाम्रो मान्यता हो । त्यसकारण हामी व्यवस्थित बसोवासको कार्यक्रमलाई स्थानीय निर्वाचनको एजेन्डाका रूपमा अगाडि सारेका छौँ ।

नदीकटान पनि भरतपुरको समस्या हो । मुख्य गरी नारायणीको कटान ठूलो समस्या छ । यसलाई सम्बोधन गर्ने एजेन्डालाई पनि हाम्रो पार्टीले महत्वका साथ अगाडि सारेको छ । नारायणी नदीको जलप्रवाहलाई व्यवस्थित गर्दा नवलपरासीतिर पनि असर नपरोस् भनेर ध्यान दिनुपर्नेछ । त्यस आधारमा हामीले योजना बनाउनेछौँ ।

भरतपुरको अर्को समस्या सुकुम्बासीको हो । सार्वजनिक जग्गामा तीन पुस्तादेखिका सुकुम्बासी बसिरहेका छन् । तिनलाई व्यवस्थित गर्ने हाम्रो स्थानीय निर्वाचनको एजेन्डा हो । हामीले सोचेको बस्ती विकासको योजनाबाट सुकुम्बासी समस्या समाधान पनि गर्नेछौँ र आवाद क्षेत्रको विकास पनि गर्नेछौँ ।

भरतपुरलाई मेडिकल सिटीका रूपमा व्याख्या गरिन्छ । यहाँ सबै प्रकारको स्वास्थ्य सेवा प्राप्त गर्न सकिन्छ । स्वास्थ्य सेवा सुविधामा वृद्धि त भएको छ तर विपन्नको पहुँच पुग्न सकेको छैन । स्वास्थ्यमा जस्तै शिक्षामा पनि विपन्नको पहुँच नपुग्ने अवस्था बन्दै छ । अर्कोतिर सैद्धान्तिक ज्ञान बढी छ र व्यावसायिक र व्यावहारिक शिक्षा छैन । यसले बेरोजगारी सिर्जना गरिरहेको छ । त्यसकारणले विपन्नको पहुँचसहितको व्यावसायिक शिक्षामा जोड दिने हाम्रो एजेन्डा छ । हामीले भू–उपयोग नीति पनि बनाउनुपर्नेछ । कृषि, बस्ती र उद्योगधन्दाका लागि क्षेत्र किटान गरी भू–उपयोग नीति बनाउनेछौँ । अहिले विदेशी लगानीकर्ताले सरकारबाट सेवा सुविधा पाइरहेको तर नेपाली लगानीकर्ताले सुविधा नपाएको गुनासो गरिरहेका छन् ।

पार्वती रावल जिल्ला सचिव, एमाले

समष्टिगत विकास हाम्रो एजेन्डा
भरतपुर भन्नासाथ देशभर नै स्वास्थ्य, शिक्षा र पर्यटकीय क्षेत्रको नामले चिनिन्छ । क्रमागत रूपमा सबै विकासका पूर्वाधारलाई योजनाबद्ध तरिकाले अघि बढाए सबै क्षेत्रको समष्टिगत विकास हुने हामीले सोच राखेका छौँ । छोटो समयमा छिटो फड्को मार्दै महानगरपालिका बन्न सफल भरतपुरका लागि धेरै ठूला योजना अघि सारेर बीचमा रोक्नु उचित हुँदैन । त्यसकारण केही नौला र जनताले सहजै महसुस गर्ने विकासलाई पूरा गर्ने हामीले अठोट लिएका छौँ ।

स्वास्थ्य क्षेत्रलाई थप मजबुत बनाउन र मेडिकल हबको रूपमा विकास गर्न अत्याधुनिक प्रविधिका मेसिनरी सामग्रीसहितको जनताले सर्वसुलभ सेवा पाउने, धेरै क्षेत्रफल ओगट्ने दुईवटा ठूला निजी अस्पताल स्थापना गर्नु आवश्यक छ । शिक्षाको उज्यालो छर्ने मुलुककै नमुना महानगर भरतपुरलाई शैक्षिक हबको रूपमा विकास गर्न एक मात्र कृषि विश्वविद्यालयको विवादलाई टुंग्याएर देशको नमुना विद्यालयका रूपमा विकास गर्न जरुरी छ ।

देशको प्रमुख पर्यटकीय गन्तव्य सौराहालाई मात्र केन्द्रित नगरी महानगरमा थपिएका क्षेत्रलाई समेटेर नयाँ पर्यटकीय क्षेत्रको विकासका लागि नयाँ योजना अघि सार्ने हामीले धारणा बनाएका छौँ । सुकुम्बासी जनताको संख्या अधिक रहेको महानगर क्षेत्रभित्र व्यवस्थित बस्ती निर्माण गरेर ती जनतालाई आवासीय र बाँच्ने आधार सिर्जना गर्न जग्गा उपलब्ध गराउन जरुरी छ । जग्गा दिनका लागि निश्चित मापदण्ड र नीति निर्माण गरेर साझा ढंगले अघि बढिनेछ ।

ईश्वरी भट्टराई जिल्ला इन्चार्ज माओवादी केन्द्र

जनसंख्या व्यवस्थापन प्रमुख योजना
भरतपुर छोटो अवधिमा महानगर बन्न सफल भएको छ । विकास र समृद्धिको सम्भावना देखेर नै स्थानीयको पहल र सरकारको इच्छाले भरतपुर महानगर भएको हो । नेपालको मध्यभागमा पनि परेकोले भरतपुरमा समृद्धिको सम्भावना छ । त्यसका लागि हाम्रो पार्टीले जनसंख्या व्यवस्थापनामा जोड दिनेछ । भरतपुरमा बसाइँसराइलगायतका विविध कारणले जनसंख्या बढेको छ । बसोवास अव्यवस्थित बनेको छ । सहर पनि कुरूपजस्तै बनेको छ । जमिन प्लटिङको नाममा खण्डीकरण बढेको छ । खण्डीकरण भएको जमिनको बाँझोपन बढेको छ ।

यस्तो कामलाई निरुत्साहित गरी योजनाबद्ध विकासको एजेन्डा हाम्रो पार्टीले बनाएको छ । त्यसका लागि खेतीयोग्य जमिन, आवास क्षेत्र, औद्योगिक क्षेत्रको पहिचान गरी बस्ती विकासको योजना बनाउनुपर्नेछ । त्यसका लागि पनि हामीले योजना बनाएका छौँ । भरतपुर मेडिकल सिटीका रूपमा चर्चामा छ । तर, यहाँ धेरै प्रकारका विकृति पनि आउन थालेका छन् । त्यसलाई नियन्त्रण गरेर क्लिन मेडिकल सिटी बनाउने एजेन्डा पनि हाम्रो पार्टीले उठाएको छ ।

हामीसँग एउटा कृषि विश्वविद्यालय छ । तर, उक्त विश्वविद्यालयमा पूर्वाधार विकास हुन सकेको छैन । विश्वविद्यालयको विवाद अझै कायम छ । त्यसकारण त्यसलाई व्यवस्थित र नमुना विश्वविद्यालय बनाउने एजेन्डा पनि हामीले बनाएका छौँ ।

भरत अधिकारी महानगर सभापति कांग्रेस

५० वर्षका लागि गुरुयोजना आवश्यक
भरतपुर महानगरपालिका देशकै विशेष र विकासोन्मुख महानगर हो । यो महानगरलाई दीर्घकालीन विकास गर्न र देशकै नमुना सहरको पहिचान स्थापित गर्न ५० वर्षीय गुरुयोजना आवश्यक छ । सबै राजनीतिक दल एकै सूत्रमा बाँधिएर मूलधार विकासका योजना अघि सारेर चुनावी मैदानमा उत्रिनु उचित होला । गुरुयोजनाका लागि सबैले साझा सोच लिएर अघि बढे अधुरा विकासका काम सजिलै पूरा गर्न सकिनेछ।

प्राकृतिक प्रकोपको समयमा धेरै क्षेत्रफलको सार्वजनिक जग्गालाई सहजै उपयोग गर्ने धारणा बनाएका छौँ । भूकम्पको समयमा घरबाट बाहिर निस्केर बस्नुपर्ने समय र घरबारविहीन हुने जनताका लागि केही समय राहत हुने किसिमले बसोवास गर्ने किसिमको पूर्वाधार निर्माण गर्न सकिन्छ । भरतपुरमा पनि काठमाडौंको जस्तै टुँडिखेल बनाउन जरुरी छ । आपत्कालीन अवस्थामा धेरै क्षेत्रफल भएको सार्वजनिक जग्गालाई उपयोग गर्न सके सबै जनताले राहत पाउने हामीले महसुस गरेका छौँ ।

भूकम्पको समयमा काठमाडौंमा टुँडिखेल र रत्नपार्क नभएको भए धेरै जनता बिचल्लीमा पर्ने थिए । त्यसकारण पनि भरतपुर महानगरमा केही आवश्यक पूर्वाधारसहितको सार्वजनिक जग्गालाई जगेर्ना गर्नु आवश्यक छ । भरतपुरको पूर्वी क्षेत्रमा रहेको मेघौली जलाधारमा जलमार्गको विकास गरेर नयाँ पर्यटकीय गन्तव्य निर्माण गर्ने सोच हामीले अघि सारेका छौँ । दिनानुदिन प्रदूषित बन्दै गएको भरतपुरको मुख्य बजारलाई देशकै स्वच्छ सहरको पहिचान बनाउन व्यवस्थित सहरीकरणमा जोड दिनेछौँ ।

बद्री तिमल्सिना जिल्ला अध्यक्ष, राप्रपा

विविधतालाई उपयोग गर्ने रणनीति छ
चितवन सामरिक महत्वको जिल्ला हो । त्यसकारण भरतपुर महानगरपालिकाले पनि निकै महत्व राख्छ । भरतपुर महानगरपालिकाको वडा नम्बर २९ मा पर्ने कविलास यस्तो क्षेत्र छ, जुन ठाउँ प्राकृतिक रूपमा निकै सुन्दर छ । भरतपुरमा गर्मीले बस्न सकिन्न । तर, भरतपुर महानगरकै कविलास क्षेत्रमा हिउँ पर्छ । त्यसकारणले भरतपुर आफैँमा विविधता भएको क्षेत्र हो । कविलासमा हिल भ्युटावर राखेर दार्जिलिङझैँ विकास गर्न सकिन्छ । त्यहाँबाट गोरखा, तनहुँ, मकवानपुर, चितवन मज्जाले देख्न सकिन्छ । त्यसकारण कविलासमा हिल भ्युटावर राख्ने एजेन्डा हामीले बनाएका छौँ ।

मंगलपुर, मेघौलीलगायतका क्षेत्रमा बाढीले हजारौँ बिघा जमिन कटान गरेको छ । त्यसलाई व्यवस्थित गर्नुपर्ने बाध्यता हामीसँग छ । त्यसकारण बाढी नियन्त्रणको एजेन्डा हाम्रो स्थानीय एजेन्डा हो । भरतपुरमा चक्रपथको निर्माण आवश्यक छ । चक्रपथ बनाउँदा बाढी नियन्त्रण गर्ने उपायसहितको हुने गरी हामीले एजेन्डा बनाएका छौँ । त्यसैगरी, सुकुम्बासी समस्या भरतपुरको जटिल समस्याका रूपमा रहेको छ । त्यसलाई व्यवस्थापन गर्नैपर्नेछ । त्यसका लागि पनि हामीले एजेन्डा तय गरेका छौँ । सुकुम्बासी समस्या समाधान निर्वाचनको स्थानीय एजेन्डा हो ।

चितवन पोल्ट्री, मेडिकल, केरालगायतका विभिन्न कुराको राजधानीका रूपमा कहलिन्छ । तर पनि ती क्षेत्रको समस्या भने सम्बोधन हुन सकेको छैन । त्यसमा हामी लाग्नेछौँ । भरतपुर मेडिकल सिटीको रूपमा चर्चा कमाउने तर निजी अस्पतालले गरिब तथा विपन्न जनतालाई दिनुपर्ने १० प्रतिशत शैयाको निःशुल्क सेवा कार्यान्वयन गरेका छैनन् । यस्तो सरकारी व्यवस्थामा गरिबको पहुँचको समस्यालाई हाम्रो पार्टी मेयरमा निर्वाचित भएमा जसरी पनि कार्यान्वयन गराउँछौँ । त्यसैगरी, भरतपुरमा एउटा रंगशाला पनि छैन । रंगशाला बनाउन सक्ने गरी भरतपुरमा जग्गा प्रशस्त छ । हाम्रो स्थानीय एजेन्डाका रूपमा रंगशाला बनाउने पनि छ ।

देवघाटदेखि त्रिवेणीसम्म पर्यटकका लागि जलक्रिडा गराउने गरी संरचना विकास गर्ने एजेन्डा पनि समेटेका छौँ । पर्यटकीय गन्तव्यको क्षेत्रमा थप विकास गर्नुपर्ने भएकाले भरतपुरमा तारे होटेल सञ्चालनमा पनि जोड दिइनेछ । क्यान्सर अस्पालतको सुधार, कृषि विश्वविद्यालयको विकास गर्ने एजेन्डा पनि समेटिनेछ । चितवनमा अहिले पनि छुवाछुत र भेदभाव छ । दलितलाई मन्दिर प्रवेशमा रोक लगाउने कुरालाई नियन्त्रण गरिनेछ । मन्दिर सबैका लागि खुला हुनुपर्छ भनेर अभियान चलाउनेछौँ । त्यसको अन्त्य गर्न जनचेतना अभिवृद्धि पनि स्थानीय एजेन्डाका रूपमा रहेको छ । ग्रिन सिटीको रूपमा भरतपुरलाई विकास गरी १० वर्षपछि मेट्रो रेल सञ्चालनमा ल्याउने एजेन्डा हाम्रो स्थानीय निर्वाचनका एजेन्डा हुन् ।

यमबहादुर परियार जिल्ला संयोजक तथा भरतपुर महानगर इन्चार्ज, माओवादी केन्द्र

सुकुम्बासी समस्या समाधानमा जोड
हाम्रो क्षेत्रको निकै ठूलो र जटिल समस्या भनेको सुकुम्बासी समस्या हो । त्यसलाई व्यवस्थापन गर्ने योजना तर्जुमा गर्नुपर्ने आवश्यकता छ । वास्तवमा यो योजनालाई हाम्रो पार्टीले अहिलेको स्थानीय निर्वाचनमा मुख्य एजेन्डाका रूपमा अगाडि सारेको छ । खासगरी, पहिलेका निर्वाचनमा एजेन्डा प्रस्तुत हुने तर काम नहुने अवस्था थियो । त्यस्तो प्रवृत्तिको अन्त्य आवश्यक छ । त्यसका लागि हामी सचेत छौँ । त्यसकारण अहिले प्रस्तुत एजेन्डा कार्यान्वयनलाई प्राथमिकतामा राखेर अगाडि बढ्छौँ ।

त्यसैगरी, भरतपुरको क्यान्सर अस्पताल आफैँ क्यान्सर लागेको जस्तो भएको छ । त्यसको उपचार र बचाउ गर्नुपर्ने अवस्था छ । त्यसमा हामी ध्यान दिनेछौँ । हुन त क्यान्सर अस्पतालको उपचार गर्नुपर्ने नीति केन्द्रीय नीतिमा पर्छ, तर हामीले स्थानीय एजेन्डाका रूपमा पनि यसलाई बनाएका छौँ । त्यसैगरी, अहिले चितवन पर्यटकीय गन्तव्यका रूपमा तेस्रो स्थानमा रहेको छ । पर्यटकबाट हुने आम्दानीले चितवनलाई महत्वपूर्ण योगदान गरेको छ । त्यसैले हामीले चितवनलाई सके पहिलो गन्तव्य, नसके दोस्रो गन्तव्यका रूपका विकास गर्ने एजेन्डा पनि समेटेका छौँ । जगतपुर, मेघौलीलगायतका क्षेत्रलाई पनि थप विकसित गर्नुपर्नेछ ।

डा. ईश्वरीराज लौडारी जिल्ला सदस्य, कांग्रेस

व्यवस्थित सहरीकरणमा जोड
हामीले स्थानीय निर्वाचनको एजेन्डामा व्यवस्थित सहरीकरणलाई प्राथमिकतामा राखेका छौँ । भरतपुरमा सडकको स्तरोन्नति गर्नुपर्नेछ । अहिलेको सडक सञ्जालले मात्रै भरतपुर महानगरको महत्व र आवश्यकतालाई परिपूर्ति गर्दैन । त्यसले गर्दा भरतपुरमा चक्रपथ निर्माण गर्ने एजेन्डा पनि छन् । यसका दुईवटा पक्ष छन्, एउटा सडकको स्तरोन्नति साथै यातायातको सहज पहुँच हुनेछ, अर्कातिर नारायणी नदीकटानको समस्या समाधानका लागि पनि काम गर्ने गरी योजना बनाएका छौँ ।

त्यसैगरी, ओभरहेड ब्रिज निर्माण गर्नुपर्ने आवश्यकता छ । त्यसलाई हामीले आफ्नो एजेन्डामा समेटेका छौँ । बोटानिकल गार्डेन, क्लिन चितवन, मेडिकल सिटीको अभियान पनि हाम्रो एजेन्डामा पर्छन् । भू–उपयोग नीतिको अभावमा भरतपुरको जमिन अव्यवस्थित र उपयोगमा समस्या देखिएको छ । त्यसको सम्बोधन गर्न स्थानीय एजेन्डा बनाएका छौँ । त्यसका लागि बस्ती विकासको क्षेत्र, औद्योगिक, कृषि क्षेत्रलगायतको पहिचान गरिनेछ । र, त्यसैअनुसार सहरीकरणमा ध्यान दिइनेछ ।

स्थानीय निजी उद्यमीहरूले आत्मसम्मान पाएका छैनन् । उनीहरूलाई प्राथमिकतामा राखेर योजना र लगानीको समस्या सम्बोधन गर्ने एजेन्डा पनि छ । जलसम्पदाको उपयोग, सौर्य ऊर्जामा विकास, बायोग्यास र प्राविधिक शिक्षामा हामी जोड दिनेछौँ, त्यसले उद्यमशीलता र आत्मनिर्भरतामा जोड पुग्नेछ । रोजगारी प्रवद्र्धन नीति तय गर्नुपर्ने बाध्यता छ । त्यो एजेन्डालाई पनि हामीले प्राथमिकतामा राखेका छौँ । निःसहाय वृद्धा, अपांगलाई दिने सेवा सुविधाका विषयमा पनि हामीले एजेन्डा तयार गरेका छौँ ।

स्थानीय निर्वाचनलाई केन्द्रित गरेर नयाँ पत्रिकाले सञ्चालन गरेको यो अभियानमा भोलि पोखरा लेखनाथ महानगरपालिका र हेटौँडा उपमहानगरपालिकाबाट विशेष प्रस्तुति